БР Милли әҙәбиәт музейы филиалы — М.Ғафури мемориаль йорт-музейында, талантлы замандашыбыҙ — билдәле шағирә, публицист, әүҙем йәмәғәт эшмәкәре, БР һәм РФ Яҙыусылар союзы ағзаһы, Башҡортостан Республикаһының атҡаҙанған мәҙәниәт хеҙмәткәре, Рәми Ғарипов, Рәмзилә Хисаметдинова исемендәге премиялар лауреаты Таңһылыу Фаяз ҡыҙы Ҡарамышеваның 70 йәшлек күркәм ғүмер байрамы айҡанлы, әҙәби-музыкаль кисә үтте. Милли әҙәбиәт музейы директоры Г.Моратованың ҡотлау сәләмен уның урынбаҫары И.Шәйәхмәтова уҡып ишеттерҙе. Юбилярҙы ҡотларға яҡындары, класташтары, яҡташтары, ҡәләмдәш һәм ижадташ дуҫтары — Яҙыусылар берлеге идараһы рәйесе урынбаҫары Р.Зәйнуллин, әҙәбиәтебеҙ аҡһаҡалы Й.Солтанов, ғалимә З.Шәрипова, әҙиптәр Т.Искәндәриә, Т.Дәүләтбирҙина, Ф.Аҡбулатова, Б.Хәлитов, Р.Сөләймәнов һ.б. килгәйне. Кисә һәүәҫкәр йырсылар З.Әбсәләмова, Г.Ырыҫҡолова, Л.Ҡолмөхәмәтованың йырҙары менән үрелеп барҙы. Режиссер Ҡ.Сафина, БР-ҙың атҡаҙанған артисы Н.Баязитовалар Т.Ҡарамышеваға йылы теләктәрен еткерҙе. Шулай уҡ Республика халыҡ ижады үҙәге янында ойошторолған «Селтәр» студияһы ағзалары А.Исхаҡова, Ф.Хәйретдиноваларҙың сығышын да тамашасылар яратып ҡараны. Башҡорт халыҡ конгресы исеменән юбилярҙы ойошманың рәйесе Ф.Байрамғолов тәбрикләне. З.Биишева исемендәге «Китап» нәшриәте күргәҙмә-һатыу ойошторҙо.
