14 декабрҙә республикала, Башҡортостан Башлығы Радий Хәбировтың Указына ярашлы, Башҡорт теле көнө һәм бөйөк мәғрифәтсе Мифтахетдин Аҡмулланың тыуыуына 190 йыл тулыу киң билдәләнәсәк. Ошо айҡанлы, 8 декабрҙә БР Милли әҙәбиәт музейының филиалы булған Мәжит Ғафуриҙың мемориаль йорт-музейы хеҙмәткәрҙәре Башҡорт кооператив техникумы (директоры — Шагапова Светлана Урал ҡыҙы) студенттары өсөн «Аҡмулла — яҡтылыҡ һәм мәғрифәт йырсыһы» тигән темаға йәнле кисә ойошторҙо. Пушкин картаһы буйынса үткәрелгән был сарала музей мөдире, ф.ф.к. Ғ.М. Бүләкованың мәғрифәтсе-шағирҙың тормошо һәм ижады тураһындағы лекция-әңгәмәһенән һуң, студенттар уҡыу йортоноң китапхана мөдире, йәмғиәт белеме фәне уҡытыусыһы Абдуллина Рәшиҙә Бикйән ҡыҙы етәкселегендә М.Аҡмулланың шиғырҙарын һөйләп ишеттерҙе. Ә инде кисәбеҙҙең ҡунағы — музейыбыҙҙың күптәнге дуҫы, һәүәҫкәр йырсы, бик күп конкурстар лауреаты, Республика халыҡ ижады үҙәгенең «Селтәр» студияһы ағзаһы Гөлгөнә Рыҫҡолова М.Аҡмулланың «Нәсихәттәр»енә ижад ителгән, шулай уҡ үҙенең «Аҡмуллаға эйәреп» тигән мөнәжәттәрҙе, халыҡ йырҙарын башҡарыуы сарабыҙҙы тағы ла байытып, йәнләндереп ебәрҙе.
Кисәне алып барыусы музейҙың ғилми хеҙмәткәре Рита Стеничкина үткәргән викторинала студенттарҙың әүҙем һәм ихлас ҡатнашыуы күбеһенсә рус телле булған аудиторияның сараны бик йылы ҡабул итеүе тураһында һөйләй.
Сара аҙағында унда әүҙем ҡатнашҡан студенттарға, уҡыу йорто етәкселегенә, кисәне ойоштороуҙа ҙур ярҙам күрһәткән Р.Б. Абдуллинаға БР Милли әҙәбиәт музейының Рәхмәт хаттары тапшырылды.
Фотогалерея